Универсиададан соң билбау көрәше Олимпия уен төре булырга мөмкин.
Төрки халыкларда традицион уен төре булган билбау көрәше (көрәш) Олимпиада программасына эләгергә мөмкин. “Моңа 2013 елда Казанда узачак XXVII Дөньякүләм җәйге Универсиада этәргеч бирергә тиеш”, – дип белдерде әлеге спорт төренең Халыкара федерация президенты Людмила Гайнанова.
Билбау көрәше буенча дөнья чемпионаты 12 октябрьдән алып 16 октябрьгә кадәр Бишкек шәһәрендә үтәчәк.
– Дөнья чемпионатында кырыктан артык илдән көрәшчеләр катнаша, – диде Л.Гайнанова. – Америка белән Австралиядән кала, барлык дөнья кисәкләрендә дә безнең спорт төре үсә, бөтен җирдә дә милли беренчелекләр үткәрелә. Билбау көрәше буенча ярышлар Казанда 2013 елгы Универсиада кысаларында үткәреләчәк. Әлеге факт безне олимпияле итеп тануга бер адым булып торыр, дигән өметтә калабыз.
Сүз уңаеннан. Башкортларда да, татарларда да, чуашларда да көрәш Җыен, Сабантуй һәм Акатуй кебек милли бәйрәмнәрнең мөһим элементы булып тора.
PROKAZAN.RU
Фото wrestlingua.com сайтыннан алынды
