“Иман” нәшриятында Вәлиулла хәзрәт Якуповның “Ислам дине бүгенге көндә” дип аталган яңа китабы дөнья күрде. Китап 392 биттән тора. Автор үзенең яңа хезмәте турында менә ниләр сөйләде:
– Хәзерге вакытта ислам дине динамик үсеш периоды кичерә, ул глобаль үлчәмдәге авырлык, авторитет һәм тәэсир ала.
Бигрәк тә әлеге процесс Россия, Татарстан мисалында үзенчәлекле. Ислам дине ныклы рәвештә иҗтимагый-сәяси тормышның үзәгендә булып, безнең көнкүрешебезне төрле яклап колачлый. Үткән ике дистә ел исә яңа ислам институтлары төзү чоры булды. Безнең күз алдыбызда сизелерлек дәрәҗәдә мөселман инфраструктурасы һәм башка яктан да актив рәвештә алга омтылучы, шул исәптән, интеллектуаль яктан да җанлы булган ислам оешмалары оешты.
Шулай итеп, бүгенге көндә ислам дине дөньяда, Россиядә, Татарстанда – ул динамик рәвештә үсүче феномен. Әлеге динамика тулысынча позитив характер йөртә. Өммәтебезнең халәте – барыбызның да тырышлык нәтиҗәсе ул. Әлеге фидакарьлек аеруча нәтиҗәле булсын өчен, ситуацияләрне – ислам дине хакындагы уй-фикерләрнең кичәгесен һәм бүгенгесен анализлау мөһим. Моннан чыгып исә динебезнең киләчәктә нинди булачагын да фаразларга мөмкин булачак. Китап бүгенге көнне һәм киләчәкне өйрәнүгә багышланган.
muslem.ru сайтыннан алынды
