string(50) "http://dumrt.ru/articles/society/society_7554.html"
08.05.2014 14:45
8 майда Чаллының “Нур-Ихлас” мәчетендә Бөек Җиңүнең 69 еллыгы уңаенан мәхәллә ветераннарын хөрмәтләү мәҗлесе булып узды. Ошбу мәхәлләдә сугыш ветераннарыннан Әсхәт ага Нәбиуллин гына исән. Ул әле аягында йөри, шуңа күрә мәҗлеснең түрендә булды. Ветераннарны котлау чыгышында мәчет имам-хатыйбы, шәһәр имам-мөхтәсибе Әлфәс хәзрәт Гайфуллин моннан 20 ел элек мәхәллә әгъзалары арасында 15 сугыш ветераны булуын искә алды. “Хәзер инде тыл хезмәтчәннәре саны да әзәя бара. 
Ветераннарыбыз даими кайгырту астында булырга, яшь буын аларга зур хөрмәт күрсәтеп яшәргә тиеш,”- диде ул. Әлфәс хәзрәт мәҗлестә сугыш һәм тыл ветераннарына мәчетнең истәлекле бүләкләрен тапшырды. 
 
Котлау сүзләренә шәһәрнең “Ак мәчет”е имам-хатыйбы, төбәк казые Рөстәм хәзрәт Шәйхевәли дә кушылды. Ул да ветераннарга озын гомер, саулык-сәламәтлек теләде, өлкән буын вәкилләренә хөрмәт күрсәтүнең мөселманнар өчен изге бурыч булганлыгын искәртте.