Татарстан ислам журналистлары әзерли башлады

15 сентябрь 2011 ел 20:51

Россия ислам университетының (РИУ) теология факультетында журналистика юнәлеше ачылды. Студентлар төп белгечлекләреннән тыш, дини-теологик белем дә алачак.

Димәк, быелдан үзләренең тормышларын журналистикага багышларга ниятләгәннәр өчен РИУ ишекләре дә ачык.

Беренче тупланган төркем җиде кешедән тора. Алар арасында яңа гына мәктәпне тәмамлаучылар белән беррәттән бүгенге көндә массакүләм мәгълүмат чараларында каләм тибрәтүчеләр дә бар. Биредә әлегә көндезге уку гына каралган. Киләчәктә исә читтән торып уку бүлеге дә барлыкка килер, дип көтелә.

Университетның уку-укыту эшләре буенча проректоры Марат Гыйльманов islam-portal.ru сайтына хәбәр иткәнчә, әлеге “факультет”ның төп үзенчәлеге булып, булачак журналистларның үз белгечлекләреннән тыш, яхшы теологик белем, ислам дине буенча өстәмә мәгълүмат алуларын билгеләп узарга мөмкин. Проректор сүзләренә караганда, факультет ислам дине турында язучы һәм дини кануннарны, тарих, мәдәният нигезләрен яхшы белүче журналистлар әзерләячәк.

Шунысын да искәртеп узыйк: республикабызда моңа чаклы мондый күпкырлы белгечлек алырга мөмкин булган башка җир юк иде.

Гөлназ БӘДРЕТДИН.

 (КФУ студенты Гүзәл Шәмсиева тәрҗемәсе)

"Дин вә мәгыйшәт"  газетасыннан

Башка журналлар

Татарстан мөфтияте 2017 елны "Галимҗан Баруди елы" дип игълан итте

Ошбу тәкъдим белән бүген Диния нәзарәте бинасында үткән пленум җыелышында мөфти Камил хәзрәт...

31 гыйнвар 2017 ел 09:09

Намаз вакытлары

Иртәнге намаз
Кояш чыга
Өйлә намазы
Икенде намазы
Ахшам намазы
Ястү намазы
Яңалыклар архивы
Tatarstan.Net - все сайты Татарстана